मोरङको बुढिगंगास्थित मनमोहन प्राविधिक विश्वविद्यालयको लेखा शाखाबाट चेक चोरी गरेपछि साट्ने क्रममा दुईजना पक्राउ परेका छन् । पक्राउ पनमध्ये एकजना विश्वविद्यालयका पूर्व विद्यार्थी रहेका हुन् ।
चेक चोरेपछि राष्ट्रिय वाणिज्य बैंक दुहबी शाखामा साट्ने क्रममा पक्राउ गरिएको हो । पक्राउ पर्नेमा सुमित सागर यादव र टंकप्रसाद यादव रहेका छन् । टंकप्रसाद भने पूर्व विद्यार्थी समेत हुन् । उनीहरुको घर सप्तरी राजविराज–६ मा रहेको छ । मोरङ प्रहरीका प्रवक्ता प्रहरी नायव उपरीक्षक बेद प्रकाश जोशीले उनीहरु विरुद्ध चोरी विरुद्ध म्याद थप गरेर अनुसन्धान सुरु गरिएको जानकारी दिएका छन् ।
विश्वविद्यालयमा चोरी भएको बेला सिसी क्यामरा क्याप्चर नभएकोले घटनामा भित्रबाटै पनि संलग्नता हुनसक्ने आशंका गरिएको छ । प्रहरीले घटनालाई सुक्ष्म रुपमा अध्ययन गरिरहेको बताएको छ । लेखामा हस्ताक्षर प्रक्रिया टुङ्ग्याएका चेकहरु चोरी भएका थिए । चोरिएकामध्ये चारवटा साटिसकेपछि पक्राउ गरिएको थियो ।
